Article N° 04 - 01 Puesia:U Paese d'Erbaghjolu

1.Tutti li pueti corsi
Senza scurdane manc’unu
In canzone o i discorsi
Tutti a paru in cumunu
Lodanu li so paesi
È l’abitanti curtesi

2.Nè vogliu fà altr’è tanti
È sò possu supranali
Mi pare chi li so canti
Sò stati originali
Avà chi tutt’aghju dettu
Principiu lu mio sunettu

3.Ripostu nant’una cresta
A manca di tavignani
A l’orlu di la furesta
Si godenu ghjorni sani
Poi nant’a li so chjassi
Quantu n’aghju fattu passi

4.U so clima cusì bonu
In n’impurtà chì stagione
Molti criticà lu ponu
Mà nun c’hè lu paragone
Un paese di cucagna
Una cità in campagna

5.E so case cusì belle
Ch’innamoranu li cori
Cumè ventu in le vele
Li prufumi è l’adori
So spaziose è à l’erbate
Ben’alzate, assulanate

6.A mezu c’hè la sò ghjesgia
A fiancu lu campanile
La meria chi s’intisgia
Fata in mudernu stile
Appena sopra si trova
L’acqua di « funtana nova »

7.Lu stradone lu percore
Una traversa l’intorna
Qualunque viaghjatore
Ghjunt’una volta ci torna
Basta quessa per pruvà
Ch’ellu c’hè lu benistà

8.Una ricetta pustale
Funziona dàpoi cent’anni
D’impurtenza capitale
Per fresteri è paisani
E per dalli meglior donu
Oghjè ci hè lu telefonu

9.C’hè la ghesgia San Martinu
Ch’ùn ci vole lascià da parte
Nata in lu seracinu
Mudellu di scultura è d’arte
Avà l’hà u guvernu in manu
Cumè monumentu anzianu

10.Più sottu ci hè la Casella
Paisolu desertatu
Purtantu fece parlà d’ella
Indù lu tempu passatu
Ci nasci lu cummandante
Ch’in Nonza fù millitante

11.U so territoriu stessu
Nè cunserva li vestigi
Di bataglie è di sucessu
U corsu contra nemici
Perchi fù in « secca funtana »
Chi lu moru lasciò la tana

12.Li fù tagliata la testa
È sopra locu interrata
Per tutti nè fù la festa
È cusi fubbe creata
Di li corsi la bandera
Ornata di à testa nera

13.Hè per què chi l’abitanti
Seguenu l’esempiu anticu
Sonu bravi tutti quanti
Pronti à more per l’amicu
Sonu generosi è fieri
È cun tutti ospitaglieri

14.Ci hè avucati duttori
Muratori cù impiegati
C’hè pueti è cantatori
Cunnisciuti è stimati
Paese riccu à l’eccessu
Oghje in pienu prugressu

15.Andendu per lu cantone
A via di Pedicorti
La ghjesgia di Sant’Antone
Lu monumentu a li morti
Quì chi nimu nun si stoni !
Di scopre cinque cantoni

16.Si scopre cinque cantoni
Corti Venacu è Sermanu
Le muntagne di Ghisoni
Vezzani li vene à pianu
Quandu lu celu ùn’hè tintu
Aleria è lu monte Cintu

17.V’aghju fattu descrizione
Di stu paese perfettu
Spiegatu a situazione
Lu nome ùn l’aghju dettu
Dà quantu m’ere imbalatu
Mi n’ere dimenticatu

18.Or lu chjamunu l’erbaghjolu
Corti hè lu so cirdudariu
In corsica unicu è solu
Nisunu dice u cuntrariu
Luce cume in celu ùn raggiu
Chjave di u cantone di gaggiu

19.Vi pregu di faci un tornu
Nè firmerete incantati
Allungherete u suggiornu
Ancu per esse pressati
Perchè chi ghjuntu quassù
Penseri lu ci n’hè più