Francescu Ottaviani dettu "Cipolla" (2.05.1927 / 23.06.2010)

E parolle sò diffìcile dà truvà in quell'ore spiumbate, mà tutti quelli ch'anu cunnisciutu à Francescu Ottaviani dettu "Cipolla" dà vicinu o dà luntanu, sanu a simplicità, a generosità è sopratuttu l'allegria di quellu chi, a beretta incalfata, hà battutu a Corsica sana à rombu di canti è chjam'è rispondi.
À Cipolla li piacia a so caccia, ghjucà à buccie, a carte, affacendà u so ortu, curà e so vacche, mà sopratuttu impruvisà è impaghjellà. Era, s'ellu si pò dì, una memoria viva. Avia una cunniscenza famosa di i lochi di tutta a pieve. Quantu testi aghju scrittu, quante canzone aghju arrigistramentu, è quante cose aghju acquistatu a fiancu à ellu.
Babbone avia sempre stalvatoghji, pruverbi o qualchi storie dà cuntà secondu ogni circustanza.
Era un piacè di stà a sente. A spessu mi parlava di a so zitellina, di a so ghjente, di u paese d'Erbaghjolu induvè ellu m'hà allevatu.
A so fiertà, era a so famiglia: "lulu a patrona", i so quattru figlioli è i so sette figliulini.
Ellu dicia sempre: "tenitemi caru quandu so vivu, micca quandu seraghju mortu" è dolu un'hè vulia sente parlà. Quantu volte emu intesu "chante et bois la maison brule!!".
Avà ti n'hè si cullatu à ritruvà i t'amichi: dà Pampasgiolu à Bebert, dà Ghjuvan Santu à Francesc'Antone, caccighjate bè, cantate à più pudè, impaghjellate chi l'avete meritatu.
Noi sapemu chi quassù, si capace di fà cantà ancu u signore.
Cipolla, si statu u Babbu straurdinariu, un Babbone eccezziunale, ci lasci un viotu tamantu mà dinù a respunsabilità di mantene u to spiritu, è a fiertà di seguità sempre a to andatura.
Un ci scurderemu mai di tè.
Un ti dimu micca addìu, mà solu a prestu..................